COMO SE TRAMITA A CONSTITUCIÓN
DE COOPERATIVAS GALEGAS.

Neste documento exponse unha guía rápida dos pasos e trámites para constituír unha sociedade cooperativa galega.
Existen dúas formas de levar a cabo a súa constitución:
a) Instar a previa cualificación do proxecto de Estatutos Sociais ante o Rexistro de Cooperativas, sendo esta a máis utilizada.
b) Outorgar directamente a escritura pública de constitución.

OPCIÓN A.- PASOS A SEGUIR:

1.1. Celebración da Asemblea Constituínte. Estará formada polos promotores-as da cooperativa, cun mínimo de catro persoas e nas de traballo asociado tres.
1.2. Elixir na Asemblea o Presidente-a e o Secretario-a da mesma, entre os promotores-as asistentes.
1.3. A asemblea constituínte debe deliberar e chegar a un acordo sobre os seguintes temas:

• Nomeamento do xestor-a ou xestores-as (persoa ou persoas encargadas pola Asemblea para facer todas as tramitacións e xestións oportunas para constituír a cooperativa).
• Clase de sociedade cooperativa que se pretende constituír e nome da mesma.
• Aprobación do proxecto de estatutos sociais da sociedade cooperativa.
• Nomeamento das persoas que, unha vez inscrita a cooperativa, van formar parte dos órganos de goberno da mesma: Presidente-a, Vicepresidente-a, un Interventor-a como mínimo e o Secretario-a.
• Nomeamento dos-as que outorgarán a escritura de constitución.
• A forma e os prazos nos que se desenvolverán os pagos ó capital social.
• Aprobación das achegas que non son en diñeiro, se as houbese.

1.4. Recoller os acordos anteriores nunha acta, certificada polo Secretario-a co visto e prace do Presidente-a da Asemblea .

1.5. Nesta acta figurará a relación de socios-as promotores-as:

• Nome, apelidos, idade, estado civil e D.N.I.
• Profesión, domicilio e nacionalidade.
• Razón social, C.I.F., domicilio e nacionalidade se son persoas xurídicas.
• Clase de explotación da que os promotores-as son titulares, cando, por razón da clase de cooperativa da que se trate, sexa requisito para ser socio.

2.1. Unha vez decidido o nome da futura sociedade cooperativa o xestor-a tramitará a solicitude de certificación negativa do nome, dirixida a:

Sección Central do Rexistro de Cooperativas.
C/ Pío Baroja, nº 6.
28071- MADRID.

É conveniente incidir na importancia desta solicitude, xa que en todos os trámites posteriores será esixida a certificación negativa do nome.

2.2. Unha vez aprobado o proxecto de estatutos sociais, o xestor-a dirixirá unha solicitude, co fin de obter a previa cualificación do proxecto de estatutos, á:

Delegación Provincial da Consellería de Asuntos Sociais, Emprego e Relacións Laborais.
Rexistro de Cooperativas de Galicia.

Adxuntando:

• Orixinal e dúas copias da acta da Asemblea Constituínte.
• Orixinal e dúas copias dos estatutos.
• Certificación negativa do nome da sociedade cooperativa.

3.1. Ó obter a cualificación previa dos estatutos procederase a outorgar ante notario-a a correspondente escritura pública de constitución, que recollerá:

• A acta de constitución.
• Relación de promotores-as (D.N.I., domicilio e profesión).
• Manifestación de que tódos os promotores-as reúnan os requisitos para adquirir a condición de socios-as da sociedade cooperativa.
• A vontade de fundar unha sociedade cooperativa, da clase da que se trate.
• Os estatutos da sociedade cooperativa, sinalando se xa foron previamente cualificados.
• Manifestación dos-as outorgantes de que o importe total das achegas desembolsadas polos promotores-as non é inferior ó capital mínimo establecido estatutariamente e que todos os-as promotores-as desembolsan como mínimo o 25% da súa achega ó capital social.
• Expresión das persoas que, unha vez inscrita a sociedade no Rexistro de Cooperativas, ocuparán os distintos cargos no primeiro Consello Rector, así coma os dos Interventores-as.
• Declaración dos anteriores que non están incursos en prohibicións ou incompatibilidades descritas no art. 48 da Lei de Cooperativas de Galicia - LCG -.
• Valoración das achegas que non son en diñeiro, se as houbese; ademais dunha relación das achegas realizadas polos distintos promotores-as.
• Declaración de que non existe outra sociedade cooperativa coa mesma denominación, acompañada da certificación correspondente.

3.2. Liquidación do imposto de transmisións patrimoniais, que se saldará a cero por estar exenta do seu pago. Para isto presentarase unha copia da Escritura Pública e o modelo 600 debidamente cumprimentado na:

Delegación Provincial da Consellería de Economía e Facenda.
Sección de Transmisións Patrimoniais e Actos Xurídicos Documentados.

3.3. Unha vez liquidado o imposto de transmisións patrimoniais pódese solicitar o C.I.F, que será necesario para que a sociedade cooperativa poida realizar calquera tipo de actividade. Para isto precisase presentar a seguinte documentación na Administración de Facenda á que pertenza o domicilio da sociedade cooperativa:

• O impreso modelo 037 cumprimentado debidamente.
• Unha copia da escritura pública da sociedade cooperativa.
• Unha copia da liquidación do imposto de transmisións patrimoniais e actos xurídicos documentados selada.

4.1. No prazo máximo de dous meses desde que estea outorgada a escritura, o xestor-a ou persoa encargada, solicitará a súa inscrición no Rexistro de Cooperativas, acompañada por:

• Copia autorizada e tres copias simples da escritura pública.
• Liquidación do Imposto sobre Transmisións patrimoniais e Actos Xurídicos Documentados.
• Memoria (declaración expresiva da clase de actividade que a sociedade cooperativa vai realizar con carácter predominante, identificándoa coa numeración e nomenclatura establecidas na Clasificación Nacional de Actividades Económicas).

OPCIÓN B: PASOS A SEGUIR:

1.1. Pedir a certificación negativa do nome da sociedade cooperativa.

1.2. Todos os promotores-as teñen que outorgar a escritura pública de constitución.

1.3. Esta escritura axustarase ó disposto no artigo 16 da LCG.

1.4. Liquidar o imposto sobre transmisións patrimoniais e actos xurídicos documentados na Delegación da Consellería de Facenda.

1.5. No prazo máximo de dous meses, desde o outorgamento da escritura, formalizarase a súa inscrición no Rexistro de Cooperativas, tendo en conta que non será admitida se non acredita a liquidación do imposto sobre transmisións patrimoniais e actos xurídicos documentados.

Esta opción non é a máis recomendada, pois ó outorgar a escritura pública sen ter a cualificación dos estatutos pode ocorrer que estes non se axusten á LCG, e sexan rexeitados no Rexistro de Cooperativas. Se fose así, habería que reformalos e outorgar outra escritura pública, ocasionando novos custos.

voltar