ELOS COOPERATIVOS

De modo moi sucinto, recollemos aquí os pasos para un proceso de selección e incorporación de novo persoal a unha cooperativa, tomando en conta que este persoal poida facer parte dela como socio (agora ou no futuro). Detémonos de forma máis exemplificante no perfil. Recollemos tamén, de xeito introdutorio, algúns dos criterios comúns ás cooperativas de traballo asociado á hora de proxectar a súa política de incorporación de novos socios e socias.

Criterios xerais para a incorporación de socios e socias cooperativistas

• Vontade de que todas as persoas que colaboran estabelmente no proxecto deveñan en socias ou socios a medio prazo.
• Prudencia extrema por non crear unha estrutura de socios e socias insostíbel. Para isto séguense os seguintes criterios:
  • Asegurar que o posto está consolidado a medio prazo.
  • Garantir que a persoa teña certo grao de polivalencia, de xeito que en situacións de crise poida cumprir outras funcións e responsabilidades.
  • Priorizar a entrada daquelas persoas que poden contribuír ao desenvolvemento empresarial e ao crecemento da cooperativa dunha forma máis estratéxica.
• Antes da entrada como socio ou socia, estabelécese un período de coñecemento do labor profesional da persoa duns dous anos (como asalariada).
• Estabelécese tamén un tempo como socia a proba, de seis meses.

Pasos no proceso de selección

1. Definición do posto de traballo que se vai cubrir e o perfil que se deriva del.

   Trátase de ver cales son as características do posto: as súas funcións e responsabilidades, as tarefas que se van desenvolver, os medios de traballo, a tecnoloxía e as habilidades para manexala etc. A partir das características do posto e en coherencia con elas, trátase de identificar cales son os elementos do perfil do traballador ou traballadora que necesitamos. Unha vez identificados estes elementos, haberá que priorizar entre eles tomando en conta: a) cales son as responsabilidades, funcións e tarefas máis estratéxicas e relevantes para a cooperativa; b) cales son as capacidades e destrezas de carácter ‘innato’ ou que se adquiren en procesos lentos de experiencia e maduración persoal e cales son aquelas que poden adquirirse en períodos de tempo menores (daráselles maior importancia ás primeiras).

2. Deseño das técnicas

   Unha vez identificado o perfil que buscamos, deseñaranse as técnicas que poden dar conta efectiva de se a persoa cumpre cada unha desas liñas do perfil. Isto significa ver qué probas son as adecuadas e darlles un contido concreto: pódense facer probas escritas de coñecementos e aptitudes, probas prácticas, cuestionarios, tests, entrevistas persoais, dinámicas de grupo etc. O deseño das técnicas tamén implica un deseño das fases de aplicación desas técnicas. Por exemplo, supoñamos que facemos primeiro unha selección a partir dos currículos e un cuestionario cuberto por cada aspirante. As persoas que superen satisfactoriamente esta proba poderían pasar á seguinte e así tantas veces como fases consideremos necesarias.

3. Anuncio e publicitación da oferta de traballo

   Trátase de chegar ao maior número de xente posíbel, tentando dirixirnos á xente que pode encaixar co noso perfil. Por exemplo, se buscamos persoas con ampla experiencia laboral non terá moito sentido poñer anuncios nas facultades. Na publicitación tamén é importante favorecer que se autoexclúan aquelas persoas que non encaixan de ningunha maneira co que buscamos: por exemplo, marcando mínimos de titulación ou indicando algunhas das condicións laborais que se ofrecen.

4. Proceso de selección: aplicación das metodoloxías e técnicas de cada fase

   Trátase de implementar as entrevistas, cuestionarios ou outras fórmulas deseñadas con anterioridade. É importante coidar a política de comunicación coas persoas candidatas: cómpre informalas das condicións do traballo que se lles ofrecen, da súa situación e valoración nas distintas fases polas que pasen e, no caso de ser excluídas do proceso, enviarlles unha carta agradecendo que se presentaran.

5. Acompañamento á persoa seleccionada

   Unha vez seleccionada a persoa que vai ocupar o posto, ademais dunha primeira xuntanza con ela para clarexar e formalizar o contrato laboral, haberá un proceso de acompañamento no seu novo posto que deberá iniciarse coa presentación de cada integrante do Consello Reitor, do seu local de traballo e, progresivamente, das tarefas que deberá ir asumindo. Toda a documentación sobre a cooperativa que se lle poida facer chegar será un bo elemento de inmersión e adaptación.