ELOS COOPERATIVOS

Número

Revista da Federación de Empresas CooperativasCSS Sinerxia

Publicacións

Informe Os Procesos de Emprendemento nas Cooperativas de Traballo Asociado en Galiza.

Acaban de publicarse os resultados do Programa de Investigación Configura, promovido pola asociación de cooperativas Eixo, no que se procuran identificar as dificultades no emprendemento cooperativo de traballo asociado en Galiza, analizando proxectos constituídos entre os anos 2001 e 2003, para achegar estratexias que fomenten o nacemento de novas cooperativas de traballo asociado en mellores condicións e consolidar estas nos primeiros anos de vida.

Este informe foi presentado no transcurso dunha xornada de difusión para o sector cooperativo, a Administración, axentes sociais, entidades financeiras, profesionais do sector e para as persoas interesadas en xeral.

Na web do Programa Configura ten acceso e pode consultar este informe, http://www.eixo.info/configura.htm.

Autoxestión Cooperativa. Manual sobre sociedades cooperativas.

Autoxestión Cooperativa nace da necesidade de dispor de material bibliográfico para impartir formación cooperativa: na formación ocupacional de persoas desempregadas e/ou ocupadas, na universidade, en proxectos de empresa cooperativos, na formación profesional etc.

Os contidos deste libro abordan:

1. Un breve histórico sobre a evolución do cooperativismo como movemento social e económico.
2. A identidade cooperativa: definición da empresa cooperativa, os principios que a sustentan e a súa tipoloxía.
3. A organización social e empresarial da cooperativa e as normas que a atinxen.
4. Os elementos persoais e os aspectos económico-financeiros e fiscais característicos deste tipo de sociedade.
5. O cooperativismo de ensino en Galiza, desde o aspecto organizativo interno (relacións societarias nas cooperativas), de intercooperación, económico (principais fontes de financiamento) e histórico (evolución das cooperativas desde a súa constitución), sen esquecernos dos sinais de identidade deste tipo de cooperativas.

Esta terceira edición trata de recoller os últimos acontecementos do cooperativismo galego: a creación do Consello Galego de Cooperativas –COGACO-, o Regulamento do réxime do rexistro de cooperativas, as modificacións contábeis incorporadas co plan contábel para cooperativas (Orde ECO/3614/2003) ou as modificacións da Lei de cooperativas de Galicia, especialmente do artigo 110 sobre o límite de persoas traballadoras non socias.

Ademais inclúe catro anexos:

1. Procesos de constitución dunha cooperativa.
2. Xestión burocrática ou administrativa da cooperativa.
3. Diferenzas entre as cooperativas e outras tipoloxías de empresas (S.L., S.A.).
4. Enderezos útiles.