ELOS COOPERATIVOS

Cooperativismo e Software Libre

O Software Libre está a chamar a atención a todo o mundo por múltiples e variadas razóns. Sen saber del, é doado pensar que trata de liberdade, tecnoloxía ou gratuidade. Case todo é certo, o Software Libre naceu para devolver ao pobo a liberdade tecnolóxica, distribuíndo o coñecemento necesario e posibilitando a independencia dos pobos neste eido. Todo isto é imprescindíbel para que os pobos poidan achegarse aos máis elevados niveis de calidade de vida, sobre todo daqueles que xa parten en desvantaxe segundo as actuais regras de xogo.

Richard M. Stallman, fundador da Free Software Foundation en 1984, foi quen de promover catro tipo de liberdades para esta tecnoloxía:

1. Liberdade de Uso (para calquera propósito).
2. Liberdade de Modificación (para isto é imprescindíbel dar o código de *COMO* se fixo esa tecnoloxía).
3. Liberdade de Distribución (pódese distribuír de balde ou cobrando).
4. Liberdade de Distribución das Modificacións.

Hoxe hai quen propón estas liberdades como catro dereitos humanos...

E esa é a diferenza entre o Software Libre e o Privativo: a liberdade, non a propiedade. Ambos os dous modelos son propietarios ou hai quen dubide que calquera software non ten autorías? A diferenza reside en que quen ten a propiedade do Software Libre non nos 'priva' da liberdade de empregalo, modificalo, melloralo ou distribuílo.

Ben sabemos que a vida é e sempre foi unha constante competición, un permanente instinto por non deixar de existir. Alén desta competición individualista, moitos seres vivos presentamos unha diferenza esencial con case todos os demais xa que somos quen de asociarmos para acadar obxectivos comúns en mellores condicións, procurando garantir o éxito nesa competición.

Velaí que, para poder facer efectiva a defensa das catro liberdades, o Software Libre rescatou o esquecido espírito 'hacker' e cooperativista que de sempre existira na tecnoloxía informática. Ese espírito perdérase pola competición mercantilista nacida ao abeiro das novas posibilidades de negocio que a informática presentaba. Ese espírito cooperativista e 'hacker' xunto coa ética defendida polo Software Libre e mais a apatía inicial por Internet amosada polos poderes fácticos provocaron a aparición de novas comunidades, organizadas sen xerarquías verticais, descentralizadas, rexidas en termos de igualdade, perfectamente comunicadas e con toda unha amálgama de valores onde o social prima fronte ao individual. Todos estes valores están en perfecta concordancia coa economía social e hoxe máis que nunca xa que con esta tecnoloxía pódese compartir, sen limitacións, calquera coñecemento. Dito isto ben claro porque o coñecemento que non se dá pérdese!

En que pode beneficiar o Software Libre á economía cooperativista?

Realmente no mesmo que ás outras economías, engadindo algo máis xa que comparten moitos obxectivos. Enumero algúns destes múltiples beneficios:

• Independencia: fornece control da tecnoloxía e da información distribuída.
• Emprego de estándares mundialmente estabelecidos en formatos abertos, comunicativos e recomendados por organizacións supranacionais (UE incluída).
• Adaptación ás necesidades de cadaquén. Isto acontece en varios eidos: tecnolóxico, económico ou idiomático. Temos as aplicacións que precisamos localizadas para a nosa cultura, co noso idioma, cubrindo as nosas necesidades, adaptando a tecnoloxía aos nosos requirimentos e non ao revés.
• Aforro continuo polo pagamento de licenzas privativas xa que saímos do ciclo económico proposto polo modelo de negocio desas empresas para seguir o noso propio ciclo.
• Gozamos dun desenvolvemento exponencial xa que empresas, universidades e gobernos de todo o mundo están a apostar pola liberdade tecnolóxica.
• Xeramos riqueza e emprego ao noso redor.
• É unha vantaxe competitiva actualmente. Poucos dubidan do futuro éxito desta alternativa mais é hoxe cando as empresas poden obter ese plus diferenciador respecto das demais.
• Somos éticos, somos libres.

Co ánimo de axudar a quen estea lendo este artigo para que amplíe a información ao redor deste apaixonante tema, deseguido deixo unhas ligazóns:

1. Free Software Foundation
2. Páxina persoal de Richard M. Stallman
3. Creative Commons
4. AGNIX, Asociación Galega que difunde o Software Libre